PRENTISIAETHAU GRADD PEIRIANNEG AWYRENNEG A GWEITHGYNHYRCHU

Gwella'ch Gwybodaeth mewn Peirianneg Awyrenneg a Gweithgynhyrchu

OPSIYNAU PRENTISIAETH A THROSOLWG O’R CWRS

Manylion allweddol y cwrs
Dyddiad cychwyn	Mis Medi
Ffioedd dysgu	£9000 y flwyddyn (cyllid ar gael i fyfyrwyr cymwys, gweler Ffioedd Dysgu a Chyllid isod)
Lleoliad	Coleg Cambria yn bennaf, Glannau Dyfrdwy Cynhelir gweithgarwch y lleoliad ar Gampws y Bae, Prifysgol Abertawe
Cyfarwyddwr y Rhaglen

Opsiynau Prentisiaeth

Gradd Sylfaen - Rhaglen 2 flynedd yw hon. Y cymhwyster olaf fydd Gradd Sylfaen mewn Peirianneg Awyrenneg a Gweithgynhyrchu.

Prentisiaeth Gradd BEng - Dyma'r rhaglen 3 blynedd lawn. Y cymhwyster olaf fydd BEng mewn Peirianneg Awyrenneg a Gweithgynhyrchu.

Y Gymdeithas Awyrenneg Frenhinol (RAeS) sy’n achredu’r rhaglenni Blwyddyn Sylfaen a Throsglwyddo BEng. Rydyn ni wrthi’n ceisio achrediad ar gyfer y rhaglen Prentisiaeth Gradd BEng.

Trosolwg o'r Cwrs

Cwricwlwm eang yw’r Brentisiaeth Gradd mewn Peirianneg Awyrenneg a Gweithgynhyrchu sy'n ymdrin ag agweddau ar beirianneg fecanyddol ac awyrenneg, dylunio peirianegol, deunyddiau, dulliau gweithgynhyrchu, aerodynameg, dadansoddi a modelu rhifiadol yn ogystal â hanfodion sylfaenol mathemateg, egwyddorion peirianneg a methodolegau dylunio.

Gan ddefnyddio'r Fframwaith ar gyfer Prentisiaethau Gradd mewn Peirianneg ac Uwchweithgynhyrchu, diben y rhaglen hon yw bodloni’r holl elfennau craidd (adrannau 1 i 5) i sicrhau bod gan ein graddedigion wybodaeth gyflawn a rhyngddisgyblaethol a fydd yn eu paratoi ar gyfer dyfodol y sector peirianegol. Cafwyd achrediad proffesiynol RAeS yn 2018 ar gyfer fersiwn flaenorol y rhaglen hon, sef cyfuniad o FdEng a BEng, a byddwn ni’n ceisio ennill ailachrediad y Brentisiaeth Gradd ddiweddaraf cyn gynted ag y bo modd.

Dyluniwyd y rhaglen ar gyfer dysgwyr a gyflogir yn y sector peirianegol, gan mai dymuniad cwmnïau fwyfwy yw cyflogi pobl â chymwysterau da sy’n gadael yr ysgol a'u cyfeirio trwy gynllun prentisiaeth gradd wedi’i sefydlu yn hytrach na chyflogi graddedigion. Mae Prentisiaeth Gradd BEng yn llwybr deniadol i gyflogeion presennol neu'r rheiny sydd wedi dilyn llwybr cymhwyster galwedigaethol yn y sector AB i ennill cymhwyster lefel gradd, gan y gellir ennill y cymhwyster ochr yn ochr â phrofiad ym myd diwydiant, a bydd llai o ddyled ar gyfer y myfyriwr.

Partneriaeth a gyflenwir ar y cyd rhwng Prifysgol Abertawe, Coleg Cambria a'r cwmnïau sy’n cyflogi yw’r radd BEng, a ddyfernir gan Brifysgol Abertawe. Prifysgol Abertawe sy’n dyfarnu’r graddau.

MANTEISION ALLWEDDOL YN SGÎL ASTUDIO YM MHRIFYSGOL ABERTAWE

Mae Prifysgol Abertawe wedi bod yn gweithio’n agos gyda byd diwydiant ers ei sefydlu mwy na 100 mlynedd yn ôl ac mae ganddi brofiad hir o ddarparu addysg o safon sy’n seiliedig ar ddiwydiant, yn enwedig ym maes Peirianneg. Gyda chefndir ymchwil rhagorol, mae’r holl bynciau Peirianneg ymysg 25 Gorau’r DU yn ôl The Times University Guide 2021.

Nodweddion allweddol y rhaglen Prentisiaeth Gradd BEng:

Tiwtoriaid Peirianneg hyfedr Coleg Cambria a Phrifysgol Abertawe sy’n meddu ar ystod o wybodaeth ddiwydiannol ac academaidd fydd yn addysgu’r modiwlau
Cyfleusterau ac adnoddau o safon fyd-eang
Cyfuniad o astudiaethau academaidd sy'n gysylltiedig â chymwysiadau galwedigaethol ymarferol ym mhob un o’r modiwlau pwnc
Cysylltiadau rhagorol â llawer o fusnesau ac arweinwyr busnes
Cefnogaeth ragorol i fyfyrwyr, ac mae gan bob myfyriwr diwtor personol
Darparwr profiadol o lwybrau prentisiaeth

EICH PROFIAD

Fel rhan o'ch cyflogaeth, byddwch chi’n cofrestru ar gyfer Prentisiaeth Gradd ac yn cael eich cofrestru fel myfyriwr gyda Phrifysgol Abertawe a Choleg Cambria. Byddwch chi’n cael eich rhyddhau o’ch gwaith am un diwrnod yr wythnos i astudio, a fydd yn cael ei gynnal fel arfer ar safle Coleg Glannau Dyfrdwy Coleg Cambria. Bydd hyn yn rhan o'ch cyflogaeth arferol ac ni ddylai fod yn ofynnol i chi wneud iawn am yr oriau ar wahân.

Bydd yr un diwrnod yr wythnos yn cynnwys dysgu ac addysgu eithaf dwys gan gynnwys cyfuniad o ddarlithoedd ystafell ddosbarth confensiynol, gwaith cyfrifiadurol a gweithgareddau ymarferol/prosiect. Bydd disgwyl ichi ymgymryd ag astudiaeth ychwanegol yn eich amser eich hun y tu allan i'r cyfnodau hyn a seilir tua 25% o'r cwrs o amgylch y prosiectau gwaith y byddwch chi’n eu cwblhau yn eich gwaith arferol. Byddwch chi’n derbyn mentor yn y gweithle a fydd yn eich arwain yn hyn o beth.

Caiff yr asesiadau eu lledaenu drwy gydol y flwyddyn a bydd cyfuniad o arholiadau ffurfiol, gwaith cwrs, adroddiadau dylunio a phrosiect yn ogystal ag aseiniadau cyfrifiadurol. Wrth ddewis y prosiect, yn enwedig yn y flwyddyn olaf, byddwch chi’n gallu nodi'r pynciau ar gyfer eich prif brosiect ymchwil a fydd yn cyd-fynd â'r rôl rydych chi'n ei chyflawni yn y gweithle.

Gofynion Mynediad

Gradd Sylfaen
Arholiadau Safon Uwch gradd BBB gan gynnwys Mathemateg a Ffiseg. Nid oes gofyniad o ran y drydedd Safon Uwch, ond byddai’n well gennym ni un o blith Cemeg, Dylunio, TG/Cyfrifiaduro, Mathemateg Bellach neu Fusnes/Economeg neu gymhwyster BTEC perthnasol gyda graddau D*DD.

Yn ogystal â hyn, mae’n rhaid i bob ymgeisydd feddu ar TGAU Iaith Saesneg a TGAU Mathemateg neu Rifedd ar radd C neu'n uwch.

Bydd Timau Prifysgol Abertawe a Derbyniadau Coleg Cambria yn asesu ac yn ystyried dysgu blaenorol fesul achos (megis gwobrau datblygiad proffesiynol neu wobrau ar sail cyflogaeth) ar lefel Addysg Uwch ond na ddyfarnwyd credydau AU ar eu cyfer.

Blwyddyn Trosglwyddo Baglor
Y cymhwyster mynediad ar gyfer y myfyrwyr hynny sy’n dymuno astudio'r rhaglen hon yw Gradd Sylfaen mewn Peirianneg Awyrenneg a Gweithgynhyrchu.

Prentisiaeth Gradd BEng
Arholiadau Safon Uwch gradd BBB gan gynnwys Mathemateg a Ffiseg. Nid oes gofyniad o ran y drydedd Safon Uwch, ond byddai’n well gennym ni un o blith Cemeg, Dylunio, TG/Cyfrifiaduro, Mathemateg Bellach neu Fusnes/Economeg neu gymhwyster BTEC perthnasol gyda graddau D*DD.

Yn ogystal â hyn, mae’n rhaid i bob ymgeisydd feddu ar TGAU Iaith Saesneg a TGAU Mathemateg neu Rifedd ar radd C neu'n uwch.

Meini Prawf Cymhwystra

Mae’n rhaid cyflogi dysgwyr am o leiaf 30 awr yr wythnos (mewn maes cysylltiedig).
Bydd yn rhaid i'r cyflogwr gytuno i'r dysgwr gofrestru ar y cwrs a chytuno ar iddo gael ei ryddhau unwaith yr wythnos.
Bydd yn rhaid i'r cyflogwr hefyd ddarparu cefnogaeth o ran mentora / goruchwylio yn y gweithle er mwyn gwella'r dysgu uniongyrchol.
Bydd yn rhaid i'r dysgwr weithio 51% o'r amser yng Nghymru i fod yn gymwys i gael cymorth cyllido'r rhaglen.

Sut Byddwch Chi’n Cael Eich Addysgu

Cyflenwir y cynnwys a addysgir ar sail un diwrnod yr wythnos yn y Ganolfan AU, campws Glannau Dyfrdwy Coleg Cambria. Rhennir y cyfleuster hwn sydd wedi’i gyfarparu’n dda rhwng Coleg Cambria a Phrifysgol Abertawe ac mae'n cynnwys ystafelloedd dysgu, ystafelloedd CP, labordai a rhywfaint o le cyffredin. Mae'r addysgu'n benodol i garfan y Prentisiaethau Gradd a bydd rhwng 25 a 35 o fyfyrwyr fel arfer yn y dosbarthiadau. Ymhlith y dulliau addysgu bydd darlithoedd confensiynol, gwaith ymarferol, enghreifftiau fesul cam, dosbarthiadau dylunio cyfrifiadurol a phrosiectau dylunio. Staff Coleg Cambria fydd yn addysgu blynyddoedd 1 a 2 yn bennaf a staff Prifysgol Abertawe fydd yn addysgu Blwyddyn 3 yn bennaf.

Mae prosiect sylweddol yn y gwaith yn cael ei gynnwys ym mhob blwyddyn, a bydd hwn yn cael ei oruchwylio gan aelod o’r staff addysgu a'i gefnogi gan fentor yn eich gweithle. Mae prosiect y flwyddyn olaf yn cyfuno agweddau technegol uwch yn rhan o broblem sy’n seiliedig ar y gwaith a chi a'ch goruchwyliwr fydd yn pennu hyn ar y cyd.

Er mwyn i ddysgwyr gael y profiad go iawn o fod yn fyfyriwr mewn prifysgol a arweinir gan ymchwil, cynhelir gweithgarwch lleoli dwys ym Mhrifysgol Abertawe yn ystod pob un o'r tair blynedd. Rhwng 3 diwrnod ac wythnos fydd hyd pob lleoliad a bydd yn gwneud y defnydd gorau o'r cyfleusterau lefel uchel sydd ar gael yn Abertawe i gefnogi gweddill y cynlluniau gradd.

Caiff yr asesiadau eu lledaenu drwy gydol y flwyddyn a bydd yn cynnwys ystod o ddulliau gan gynnwys profion ac arholiadau ffurfiol, gwaith cwrs ysgrifenedig a chyfrifiadurol, adroddiadau ymarferol a phrosiect, cyflwyniadau a rhywfaint o asesu cymwyseddau ymarferol. Yn ogystal â'r oriau a addysgir, bydd gofyn i’r myfyrwyr ymgymryd â chyfnodau o astudiaeth hunangyfeiriedig a chyfnod mewn lleoliad ym Mhrifysgol Abertawe.

Ffioedd Dysgu a Chyllid

Gradd Sylfaen - £7500 y flwyddyn am 2 flynedd o astudio. Darperir cymorth cyllid drwy raglen Prentisiaethau Uwch Llywodraeth Cymru (ar gyfer myfyrwyr cymwys o'r DU/UE).

Blwyddyn Trosglwyddo Baglor - £9000 am flwyddyn. Nid oes cyllid cyhoeddus ar gael ar gyfer y rhaglen Blwyddyn Trosglwyddo Baglor (fel cymhwyster annibynnol); mae’n rhaid i'r cyflogwr, y myfyriwr neu gyfuniad o'r ddau dalu’r ffioedd dysgu.

Prentisiaeth Gradd BEng - £9000 y flwyddyn am 3 blynedd. Cyngor Cyllido Addysg Uwch Cymru (CCAUC) fydd yn darparu’r cymorth cyllid (ar gyfer myfyrwyr cymwys yn y DU/UE).

Ariennir y Rhaglen Prentisiaethau Gradd yn llawn gan Gyngor Cyllido Addysg Uwch Cymru ar gyfer y flwyddyn academaidd 2020/21*. Ni fydd yn rhaid i fyfyrwyr cyflogedig cymwys dalu ffioedd cwrs.

*Hwyrach y bydd y cyllid hwn yn ddarostyngedig i newid

Sut i Gyflwyno Cais

Nid yw'r cwrs hwn yn recriwtio trwy UCAS.

Y cam cyntaf yn y broses hon yw cysylltu â chydlynydd y rhaglen, Eleri Bowen, a fydd yn gallu rhoi cyfarwyddyd ichi ynglŷn â’ch cais.

Cysylltwch ag Amy Rose-Challis drwy e-bostio a.t.rose-challis@swansea.ac.uk. Ar ôl y cam hwn, bydd yn rhaid ichi gyflwyno cais uniongyrchol.