Rhieni a Gwarcheidwaid

O ystafelloedd sengl ym mhreswylfeydd y Brifysgol i rannu tai â ffrindiau, mae cynifer o ddewisiadau llety i'ch plentyn ddewis rhyngddynt yn Abertawe. Beth bynnag eu dewis, rydym ni'n gwneud popeth y gallwn i wneud yn siŵr eu bod wedi'u cefnogi'n dda yn ystod eu camau cyntaf a chyffrous tuag at annibyniaeth.

Yn ystod y broses hon, mae'n bwysig ymweld â ni yn ystod un o'n Diwrnodau Agored. P'un a ydych chi'n cymryd taith ar y safle neu daith rithwir, byddwch yn gallu gweld ein llety dros eich hunain. Mae diwrnodau agored yn rhoi cyfle i siarad yn uniongyrchol â'r tîm llety, sydd bob amser wrth law i ateb cwestiynau sydd gennych chi a'ch plentyn.

Cofiwch, mae'n rhaid i'ch plentyn wneud y penderfyniad sy'n gywir iddo ef. Er bod y rhan fwyaf o'n myfyrwyr yn dewis byw mewn preswylfeydd a thai preifat, rydym ni hefyd yn croesawu llawer o fyfyrwyr sy'n cymudo. Os ydych chi'n byw yn agos at ein Prifysgol, gallai dewis cymudo fod yn ffordd wych i'ch plentyn arbed arian wrth astudio.

💡 Dysgwch sut gwnaeth Becka Eva, sy'n fyfyriwr presennol yn Abertawe, benderfynu ar le i fyw wrth astudio ar gyfer ei gradd mewn Troseddeg.

Llety'r brifysgol yw'r dewis mwyaf poblogaidd ymysg ein myfyrwyr yn y flwyddyn gyntaf. Dyna'r dewis mwyaf diogel - mae gan ein myfyrwyr fynediad at amrywiaeth o rwydweithiau cymorth lles yn ogystal â'n swyddogion diogelwch 24-awr ar y campws. Gan fod pob un o'n preswylfeydd naill ai ar y campysau neu'n agos atynt, mae ganddynt gysylltiadau da o ran trafnidiaeth ac maen nhw'n elwa o lawer o gyfleusterau ar y campws, gan gynnwys BywydCampws, ein gwasanaethau arlwyo a chyfleusterau. Gweler ein fideo gan Matthew Turner yn y Gwasanaethau Preswyl am ragor o wybodaeth.

Bydd eich plentyn ymysg cymheiriaid sydd hefyd yn cael profiad o fywyd oddi cartref am y tro cyntaf. Wrth geisio dysgu sut i fyw'n annibynnol, bydd eich plentyn yn cymdeithasu ac yn dysgu mewn amgylchedd cynhwysol, yn cwrdd â ffrindiau newydd o bedwar ban byd, ac yn meithrin ei hunanhyder.

Bydd talu bob tri mis yn gwneud cyllidebu'n haws i'ch plentyn; ni fydd yn rhaid iddo boeni am filiau ychwanegol oherwydd fel arfer bydd ffioedd yn hollgynhwysol - gan gynnwys cyfleustodau, y rhyngrwyd ac yswiriant ar gyfer yr ystafell.

💡 Mae hiraethu'n rhan naturiol iawn o symud i ffwrdd i'r brifysgol. Mae'n arferol i'ch plentyn deimlo wedi'i lethu i ddechrau. Peidiwch â phoeni! Mae gennym rwydwaith cymorth llawn i fyfyrwyr sy'n byw yn ein preswylfeydd yn y brifysgol. Mae ein Cydlynydd Bywyd Preswyl a'n Cynorthwywyr Bywyd Preswyl wrth law i helpu'ch plentyn i addasu at fywyd yn y brifysgol.

Fel arfer, bydd rhannu tŷ â ffrindiau yn ddewis poblogaidd i fyfyrwyr yn yr ail flwyddyn. Er y gallai eich plentyn ddewis aros mewn preswylfa eto, mae'n debygol y bydd yn symud i lety preifat er mwyn cael mwy o annibyniaeth. Mae chwilio am dŷ yn gallu peri pryder, a dylech chi fod yn ofalus wrth ddod o hyd i asiant ag enw da i'ch plentyn.

Os bydd eich plentyn yn penderfynu byw oddi ar y campws, mae digon o lety o safon yn y sector preifat yn Abertawe. Rydym ni'n argymell bod ein myfyrwyr yn defnyddio StudentPad Abertawe wrth chwilio am fflatiau neu dai.

Gwnewch yn siŵr eich bod yn archwilio ardaloedd gwahanol yn Abertawe er mwyn helpu'ch plentyn i wneud y penderfyniad cywir, a gofynnwch gynifer o gwestiynau i'r asiant llety ag y mae eu hangen. Os gallwch chi, cofiwch siarad â'r tenantiaid presennol am eu profiad o fyw yno.

Mae byw mewn llety preifat yn ffordd wych o ymdrochi'n llawn yn ein dinas a'i diwylliant. Bydd yn cynnig mwy o breifatrwydd, a'r gallu i ddewis pwy rydych chi'n byw gyda nhw - sy'n gallu creu profiad gwell i'ch plentyn - a ble rydych chi'n byw. Bydd y rhan fwyaf o lety preifat yn yr ardaloedd mwyaf poblogaidd i fyfyrwyr yn Abertawe, a bydd cysylltiadau trafnidiaeth da a mynediad at siopau, barau a busnesau bwyd.

💡 Er bydd y rhent fel arfer yn rhatach na llety'r Brifysgol, bydd yn rhaid i'ch  plentyn dalu am unrhyw filiau a chyfleustodau ychwanegol. Bydd angen iddo reoli ei gyllideb yn ofalus a bod yn ymwybodol o'i hawliau fel tenant. Gwnewch yn siŵr bod eich plentyn yn gofyn a fydd dodrefn yn y llety neu beidio. Os na fydd dodrefn, efallai bydd angen iddo gyllidebu ar gyfer pethau fel gwelyau ac offer cegin.

Os ydych chi'n byw yn lleol, gallai byw gartref fod yn ddewis mwyaf amlwg ar gyfer eich plentyn - gall aros yn agos at deulu a ffrindiau ac arbed arian. Mae aros gartref yn ddewis gwych; mae'n gyfleus.

Nid yw aros gartref yn golygu y bydd yn colli'r profiad 'llawn' o Brifysgol Abertawe. Mae gan fyfyrwyr sy'n dewis cymudo yr un mynediad at ein holl gyfleusterau â myfyrwyr sy'n byw mewn preswylfeydd, megis ein llyfrgelloedd, ein gwasanaethau arlwyo a'n campfeydd. Os bydd yn cwrdd â ffrindiau newydd sy'n byw mewn preswylfeydd, bydd hefyd yn gallu ymweld â nhw ac aros dros dro.

💡 Mae llawer o'n myfyrwyr yn cymudo o drefi a dinasoedd cyfagos, ac yn elwa o'n hamrywiaeth o gymdeithasau, digwyddiadau a rhwydweithiau cyfeillgarwch eraill. Rhagor o wybodaeth am y cymorth y gallai eich plentyn ei gael wrth fyw gartref.

Mae gan Brifysgol Abertawe ddigon o opsiynau i wneud i fyfyrwyr deimlo'n gartrefol.

Mae Prifysgol Abertawe'n cynnig amrywiaeth o lety myfyrwyr ar draws pedwar lleoliad, gydag ardaloedd dynodedig sy'n cynnwys llety tawel, un rhyw, dialcohol, aeddfed a siaradwyr Cymraeg. Mae swyddogion diogelwch 24 awr ar y campws, a rhwydwaith cymorth pwrpasol sy’n gallu cynnig help a chyngor drwyddi draw.

Dylai ymgeiswyr gyflwyno cais am lety cyn gynted ag y bydd rhif myfyriwr ganddynt, a'r Tîm Derbyn Myfyrwyr fydd yn anfon hwn. Mae hyn yn berthnasol i fyfyriwr sydd â chynnig amodol neu gynnig yswiriant i astudio. Caiff llety ei warantu os cyflwynir ceisiadau cyn 30 Mehefin, ac nid oes rhaid talu unrhyw beth ymlaen llaw. Ni fydd angen blaendal tan i'ch plentyn gael cadarnhad o'i le yn y Brifysgol ac mae am dderbyn y cynnig llety.

Peidiwch ag aros tan ddiwrnod y canlyniadau oherwydd na fydd y polisi gwarantu llety yn eich cefnogi erbyn hynny gan ei fod yn dod i ben ar 30 Mehefin.

Mae dechrau yn y brifysgol yn amser cyffrous iawn i’ch plentyn, ond gall y straen meddwl am yr hyn mae ei angen fod yn frawychus. Edrychwch ar ein rhestr wirio cyrraedd ar wefan ein prifysgol i gael canllawiau am yr hyn mae'n rhaid iddo ddod ag ef.

Pan fydd eich plentyn yn dechrau yn y Brifysgol, bydd ganddo fynediad at ein gwefan i fyfyrwyr, MyUni, lle gall gael mynediad at y Llawlyfr i Breswylwyr ar gyfer y breswylfa a ddynodwyd iddo. Yn ogystal, mae'r tudalennau llety ar MyUni yn cynnig yr holl wybodaeth y bydd ei hangen ar ein myfyrwyr am fywyd wrth fyw yn ein preswylfeydd. Mae'r lle yn rhoi gwybodaeth i fyfyrwyr ynghylch â phwy y dylent siarad os bydd problemau llety, sut i gysylltu â'r tîm cyllid am daliadau, sut i ymgysylltu ag eraill drwy weithgareddau cymdeithasol preswyl a llawer mwy.